فكرانى بحب كثير .. احمد عبد الرحمن
فكرانى بحب كثير
وفكرانى بحب تير
وبتنقل على الاشجار
كما العصافير
واشم الزهرة والدغها
كما الدبابير
واحط السم فى الكلمة
بتغوى الغير
تقول محتال على حوا
وفكرى خطير
وقلبى يلف فى الضلمة
وفى الدياجير
وعقلى يظل يتعنى
من التفكير
واصوغ الحب فى كلمة
كما التعبير
وارسم لوحة مكذوبة
من التصاوير
واتنهد واتمدد واتنفس
من التزوير
سعات الليل بقضيها
بسعى حقير
ألف وادور كما الموتور
وقلبى كسير
عيونى تروح وبتسافر
بعيد مشاوير
وترجع تانى مجروحة
بدمع غزير
أكحلها من الأنثى
وطرفى حسير
تقولى حاذر الدنيا
وفخ خطير
يجيب رجلك ويظهرلك
عيوب ..ياكبير
تبان الشيبة والعيبة
ياطفل صغير
حذارى لدغة الانثى
بمكر كبير
تبات الليل تخططلك
تجهزلك بسوء تدبير
حتلقى الشهد باديها
زلاله مرير
وتلقى الجنة دى ضلمة
تعيش فى سعير
تديق الدنيا قدامك
وفى السكة تشوف تعاتير
فهمت القول ياطفل كهول
ولا أعيدها كتير ؟؟؟؟؟؟
سمعت القول كدا مكشوف
مفهش كسوف ولاتبرير
سندت بضهرى ع الكرسى
ومن فورى هجرت سرير
ودقة قلبى موجوعة .
...ومسموعة
وبتصارع شهيق وزفير
معاذ الله يامولاتى أكون شرير
ويمرح قلبى فى العتمة
كأنه ضرير
ظلمتينى وأنا المظلوم
جرحتينى وأنا المكلوم
وجرح الصب يا غالية
داجرح كبير
تصيب القلب بلسانك
بسهم خطير
وليه تحكم ولاتسمع
ولاتسأل كأن وزير
بتدلل وتتوعد كأن أمير
رعاك الله يامولاتى
من التكدير .. من التشهير
ولما النحل يتنقل بعيد ويطير
بين الازهار بين الاشجار
يشم عبير
ولو كان العبير جنبه
ولو غطى الربيع دربه
لاكان سافر ولاهاجر
وراح مشاوير
وليه يستبدل الصبار
بالجورى ..؟
دا فرق كتير
وليه يطلع جبال الشوق
ويزعق فوق
وعزة نفس لاتجاوب
ولاتداوى لقلب أسير
كأن حنانه بات صخرة
بلا احساس ولا تأثير
وجاى بتلوم وبتعاتب
وتعطى الحق لجنابك
وتتلمس ليك المعاذير
وفين الحب اللى كان بينا ؟
وفين الشوق على جبيننا ؟
وفين الوعد لسنيننا ؟
نعيش للحب
نعيش بالحب
نعيش ع الحب
بلاتغيير
وفين الفرحة اللى فى عيوننا
كانت ترقص وتدعيلنا
تبلغنا غرام العين ؟
يافرح سنين
ياجرح سنين
ياعطفة ود فى قلوبنا
يابحر حنين .
دا انت الكل فى الدنيا
وأنت لقلبنا جنة
وحبك فرض والسنة
ليه تعتب وتظلمنا ؟
وايه اللى صار منا ؟
وهو الجرم فى سنينا
ان انا حبيت ..
وأنك كمان حبيت
تشوف الشر فى حرفى ؟
وانت كلمتى وحرفى
وانت قوتى وضعفى
تكون فى ايديك
تقول محتال ؟
وانا بامشى كما الدلال
أنادى عليك
وانت الشمس وشعاعها
تدفينى وتحيينى
ابص عليك
أشوفك فى وشوش الناس
ياكل الناس
يابحر العشق والاحساس
وبغرق فيك
وسعة العتمة والضلمة
بتسرح فكرتى هايمة
تفكر فيك
وعز النوم
فى ليل او يوم
بتلقانى راح احلم بيك
تشوف اللوحة مكذوبة ؟
وانت مليكة منصوبة
على عيونى ..على عقلى
وقلبى سرير
ومحفورة فى الشغاف جوا
بلا تصوير
وانت ع الشفاة غنوة
بلا تغسير
ياااااااااااااااه
قسيتى كتير .. ظلمتى كتير
بتلوح لى بالتعيير ؟
وامته الحب كان عيبة
وقيس قالها فى الاشعار
جميل راح يحكى فى الامصار
كثير يتغنى فى الاسفار
وهاملت هام مع الاسحار
ولو كتبوا فى عشقنا أسفار
مابتوفى ولاتكفى ..
ولاذرة من القنطار
ولاقطرة بجنب بحار
ولا نقطة من الامطار
وهى الناس ببتستخفى من الاقدار ؟
أدينى بسمع الدنيا
انت أحسن الاقدار
وبتقوللى ..
بلاش تعمل كما المغوار ؟
ساعات الليل بقضيها
ودايب فيك
اشم النسمة فى حرفك
والاقى السكة بين أياديك
وهى الغلطة ياعمرى حنانى اليك ؟
وهو الحب والطيبة يصير عيبة ؟
جتك خيبة .. زعلت عليك
داعمر الحب ياعمرى
مايعرف سن
ولو سكن الغرام صخرة
لاتسمعها فى يوم بتئن
وتلقى النخلة تتمايل وتتعاجب
وتشوف النجوم للقمر بتحن
وتلقى النحلة للدبور
فى وسط صخور
فى الجبل بتزن
تحذرنى من الانثى ؟
وكيف أنسى ؟
أمى هذة أنثى
اختى مثلها أنثى
وبنتى هكذا أنثى
وآدم عنده أنثى
وتلكم جنتى أنثى
ودنيا البشر أنثى
وأنت كل ذى الانثى
وكيف أنسى ؟
سكنتينى
ملكتينى
بتجرى فى شرايينى
وأنت الروح وف سنينى
ياكل الكون ياتكوينى
احبك ..منذ تكوينى
وأنت الحور.. بل عينى
لتهدينى وتدنينى؟
فلبينى
وداو الجرح أحيينى
أنا عاشق وبستنا
نعيد اللى كان بينا
ونزرع ورد فى سنينا
ستارة شوق بتحضنا
بترفعنا تنزلنا
بتسعدنا تبهدلنا
بتروينا تدبلنا
وكل اللى كان بيننا
لابد يعود
دا كله وعود
ياأحلى عهود
دانت الجذر والثمرة
وانت الجذع والزهرة
غصونى ضفايرك الخضرا
يا أجمل عود
ياأيقونة من التلمود
تعالى نعود
تعالى نعود
تعالى نعود..
د .... احمد عبد الرحمن
تعليقات
إرسال تعليق