الواد شحاده الشاعر محمد عبد العزيز
أنوه الى أن إسماعين هو إسماعيل طالب الفنون الجميله الذى عقره كلب الست ام كلثوم أمام فيلتها بالزمالك والذى كتب فيه (الفاجومى) أحمد فؤاد نجم قصيدته الشهيره (كلب الست) ودخل السجن بسببها
---------
إنت فاكر يوم ماكلب الست جاب بطن اسماعين
يومها قامت القيامه
والفاجومى قال قصيده لسه عايشه من سنين
إلنهارده كل عيل من شارعنا عنده كلبين أو تلاته
وال غاظنى وخلى عقلى شت منى الواد شحاته
أمه بتبيع اللمون عند المحطه
ويوم تبيع كمون وشطه
لاجل ماتوفر لها جنهين تلاته
لكن المحروس شحاته
عقله غاب من الهباب
اللى انتشر جمله وفراطه
أصله كان تلميذ صنايع
واد مرقع فى الخراطه
أمه قالت يبقى سندى ع المعايش
ويعاونى يوم ماييجى ابن الحلال يخطب غوايش
لكن المزغود شحاته حب يعمل زى لولو ابن السفير
شوفته من كام يوم
ماشى فى الشارع ولابس سلسله
وفى ايده ساحب جلجله
كلبه رومى وبنت ناس ونسبها عالى مأصله
ناديت عليه ، رد بأدب زى الذوات: وى مسييه
أنا عقلى شاط ، ورزعته كف على قفاه
يمكن يفوق ، وأكسب فيه ثواب
نطت فى وشى جلجله
فاتحه حنكها أبو ألف ناب
وبعيد عن السامعين
جرالى اللى جرى
يوم ماكلب الست جاب بطن اسماعين
محمد عبد العزيز
تعليقات
إرسال تعليق