حدانا كل شيء محسوم الشاعر محمد عبد العزيز

حدانا كل شيئ محسوم

حدانا كل شيئ مقسوم

بقسمة عدل ياجمالها ، ولكن

بين كبار القوم

دبحنا العجل ياساده 

وفرقناه كما العاده

لفرعون - لحم الكتف والفخدين

بياكل منها ويفرق على الحراس

وع الكاهن وع البصاص

وع القاضى اللى مش فاضى

ياعينى عليه ينام ساعه

ولا قادر يصلى الفجر فى جماعه

ولا مره عرف قلبه طريق الخير

وحس بلذة الطاعه

وأما الفشه والعفشه

نصيب معلوم للجابى وللسجان

وقلب العجل والكبده

لزوم الأنس للحاجب وللندمان

وراس العجل ياساده بتتقسم مع الكرشه

وتتوزع مابين مداح وبين خولى على البستان

ويفضل للرعيه الديل

معاه الجلد والحافر

وشيئ فاخر 

ملولو زى ديل الخيل

محمد عبد العزيز شعبان

شاعر وقصاص