بنتي الشاعرة حنان العجمي

بقلمى/حنان العجمى٢٠٢٠/٧/١١

رسالة من أُم مُضَحِّية لإبنتها

نص بالعامية المصرية بعنوان "بنتى"

لَوْ عَ الكلام والحروف دا لِعبِتِى

لون الدنيا ف عينيكى دى قصتى

عارفة إنك عَجولة بالكتير سطرين مَلولة

مِشْ هَقُول كِتير ولَوْ على أحلامى آخدِك وأطير

أَبعَت رسالة"أ-ب-ع-ت-ر-س-ا-ل-ة

و دِى حروفها

أ- بحرف الألف أَوَصِّيكى الله ارجعِيلُه

صلاة اسجُدِيلُه وَحدُه يَنَجِّيكِى

ب-حرف الباء كان بداية نَوَّر عُمرى بِيكِى

وبُكرا أشوفِك شابة

 ولا دَمعَة بِعنيكى واقفة

وعروسة جُوَّا زَفَّة

ع-حرف العين عِشت عَشانِك حياة الموت وشهادة اتشَاهِدت لكن مَنكِرش فرحت 

بكل ضحكة طالعة مِنك شُفت

ت-حرف التاء تِعِبت و مَا هَفَرَّط فيكى 

إلَّا لِلِّى يعرَف يِبنى بيت يِحمِيكِى

ر-حرف الراء رُوحِى شُقِّى طريقِك بِإيدِيكِى

ومَا تِسمَحى لِحَد يِهِد فِيكِى

س-حرف السين سنين رَاحِتْ عِجَاف

 وسنين جَايَّة قِطَاف

وزهور حَوَالِيكِى

سَوَا حَارِبنَا الصَّعب

عَوَّضِى صَبرِى لَوِّنِى دُنيتِى

 فَرَّحِى القلب

أ-حرف الألف التانى أحلِف حَقك مَا هَسِيب

وميزان العدل مَا هَيْمِيل وإلِّلى حَرَمِك حِنِّيِّتُه

واتخَلَّى عن مسؤوليتُه هَيِندَم على قسوِتُه

ل-بحرف اللام لازم أحكِى الحكاية لأولادِك

وأدعيلك زوجك يكونلك الأب والزوج والسّنَد فى حياتكِ وربنا يِدِّينى العمر و أولادِك أشوفهم

ورحمة وقوة أعلِّمهُم

 وأدعِى رَبِّى من غدر لِئام يِحفَظهُم

ة-وبحرف التاء المربوطة إحنا حِزمَة مَربوطة

ولا يُمكِن حَدْ يِفَرَّقنا

قرآنَّا هو إلِّلى حَافِظنا

وإيد رَبِّنا دَايْماً مَمدودة

ودِى نهاية رسالتى ولأحفادى هَتكون روايتِى

بقلمى الشاعرة/حنان العجمى٢٠٢٠/٧/١١