وليه طعم الحياة الشاعرة سوزان محمد

( و ليه طعم الحياة )

===========

و ليه طعم الحياة

علقم صَبَح مُرّ

نهارُه زَىّ الليل

ساعات

و بِتمُرّ

لا حد عُمرى أذِيت

و لا عُمرى راح اضُرّ ..

و ليه

دايماً 

معايا يا دُنيا

شايلَه و حَطَّه

دانا عِشت عمرى بحالُه

و لا يوم أذِيت قُطَّه

ليه لمَّا يِفرَح قلبى

و ينُطّ كام نَطَّه

الشهد يقلِب مُرّ

و الحلو صار شَطَّة ..

ليه لمَّا اقول أضحَك

ألاقيها تِقلِب غَمّ

قبل امَّا افوق و افرَح

أغرَق

فى همّ و همّ

يا دُنيا ليه معاكْسه

حتى العسل

فيه سِمّ

حَطَّانى ليه فْ بالِك

و حفِظتى اسمى صَمّ ..

ليه فى النهار اتمَنَّى

تتغَيَّر الأحوال

أوِّل ما ييجى الليل

يِتجَدِّد المَوَّال

تِمضِى شُهور العُمر

و الحال نَفْس الحال

العُمر كلّه صيام

و ما جاشى ليه شَوَّال !!! ... بقلمى / سوزان محمد